domingo, 8 de febrero de 2009

Alejandro Cueli: «Nun se ve la catástrofe nel serviciu d'agua cola que quieren xustificar la privatización»

http://www.lesnoticies.com/
B. R. VIADO

¿Cuáles son les razones poles que la Plataforma refuga la privatización del agua n'Avilés?
-Tenemos munches, pero principalmente que nes elecciones pasaes nengún de los tres partíos que defenden la privatización lo llevó nel programa electoral. Ye una decisión qu'escondieron. Amás, entendemos que l'agua ye un bien escasu y que ye de toos y por esa razón nun pueden decidir 23 persones por 84.000. Basándonos nesto, acoyémonos a la Constitución, a la Llei de Bases de Réxime Local y al Reglamentu de Participación Ciudadana pa recoyer firmes pa pidir una consulta popular, un referéndum, onde sía la ciudadanía la que decida qué modelu de xestión del agua considera más amañosu y xustu.

¿Quién forma la Plataforma?
-La Plataforma nació dende les asociaciones vecinales, ye un movimientu plural, y nella tán tanto partíos políticos como fuerces sociales de la ciudá, tolos sindicatos, y la Unión de Consumidores y Usuarios, ente otros. Toa esta xente tamos lluchando contra un fenómenu que se produz en cuasi tol planeta: al ser l'agua un bien escasu, les multinacionales, les grandes empreses, quieren tener el control del agua y esi control piérdelu lo público, que ye quien tien que xestionar l'agua. Les multinaciones tán intentando garrar el control del agua y pa eso tán usando políticos, moñecos, que de mano habíen representanos a nosotros y faen lo contrario: representen a les grandes empreses.

¿Qué se va plantear na consulta popular que reclamen?
-Na recoyida de firmes pídese l'apoyu a una iniciativa popular de propuesta que recueye'l Reglamentu de Participación Ciudadana y lleva consigo tres apartaos. Lo primero que pidimos ye la paralización inmediata del procesu de privatización del agua; lo segundo, que'l serviciu d'agua tien que siguir llevándose dende lo público, nunca con inxerencies privaes; y lo tercero, que se va facer una consulta popular d'ámbitu local onde se formule esta pregunta: «¿Cuál ye'l modelu pa la xestión del agua que considera más favorable pal interés xeneral de los avilesinos y avilesines?» . Y ehí van les cuatro opciones qu'hai que dar, según s'estipula nel Reglamentu: xestión directa del Conceyu, empresa pública cien por cien, empresa mista o empresa privada. Asina la ciudadanía pue escoyer la opción que más-y interese.

¿Cuántes firmes van recoyíes?
-El Reglamentu pide'l diez por cientu de la población y eso yá lo tenemos: yá van más de 9.000 firmes. Eso déxanos volver a llevar la cuestión al Plenu y qu'ésti diga sí o non a la consulta popular. El Reglamentu de Participación Ciudadana aprobáronlu unánimemente tolos partíos políticos que tán nel Conceyu y nel so articuláu permite esto, polo qu'agora tienen mui difícil dicir que non, porque nun diba ser de recibu que primero votaren que sí al Reglamentu y depués que non cuando nun-yos interesa.

¿Sería vinculante'l referéndum?
-Por supuestu que sí. El referéndum tien que ser vinculante porque asina lo recueye la Constitución, la Llei de Bases de Réxime Local y el Reglamentu de Participación Ciudadana.

¿Cómo funciona agora mesmo'l serviciu del agua n'Avilés?
-Agora mesmo nengún ciudadanu nota la catástrofe que los partíos políticos describen pa xustificar la privatización. L'agua tien una calidá mui bona, llega a les nuestres cases a un preciu razonable y tamos toos contentos col serviciu. Nel Conceyu dicen qu'hai que cambiar una montonera de tuberíes, qu'hai qu'aumentar la plantiya... Pero si se llega a esta situación ye porque lo foron dexando caer y nun s'invirtió lo necesario, como yá alvirtieren qu'había que facer va tiempu técnicos del conceyu. Y en cuantes a la plantiya, de 36 tán trabayando 18. Con too y con eso, cualquier cosa que se plantee de lo privao va ser pa que la empresa tenga beneficios, non pa beneficiar al ciudadanu.
LLEA COMPLETA ESTA ENTREVISTA NA EDICIÓN IMPRESA DE LES NOTICIES.

4 comentarios:

Anónimo dijo...

Cueli pa cordinador de IU ya!

Pablo dijo...

Soy militante socialista y viejo, un saludo a la plataforma y adelante contra la Privatización.

usuario comprometido dijo...

Pablo, muchas gracias por tu apoyo.

usuario comprometido dijo...

Anónimo, te agradezco la confianza que depositas en mi, pero no tengo aspiraciones políticas.